ദില്ലി: പ്രധാനമന്ത്രി നരേന്ദ്രമോദിയെയും കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുടെയും മണ്ഡലങ്ങളില്‍ അവരെ എതിരിടാന്‍ ഒരു മലയാളി ഇക്കുറി ഇറങ്ങുന്നുണ്ട്. ഇന്ത്യന്‍ ഗാന്ധിയന്‍ പാര്‍ട്ടിയുടെ (ഐജിപി) ദേശീയ തെരഞ്ഞെടുപ്പ് സംഘാടകനായ തൃശൂര്‍ സ്വദേശി യു എസ് ആഷിന്‍. തൃശൂര്‍ ആസ്ഥാനമായി പ്രവര്‍ത്തിക്കുന്ന ഇന്ത്യന്‍ ഗാന്ധിയന്‍ പാര്‍ട്ടി 2011 ലാണ് രജിസ്റ്റര്‍ ചെയ്യപ്പെട്ടത്. പ്രധാനമന്ത്രി നരേന്ദ്രമോദിയുടെ മണ്ഡലമായ വാരണാസിയിലും രാഹുല്‍ ഗാന്ധിയുടെ മണ്ഡലമായ അമേഠിയിലും ഇന്ത്യന്‍ ഗാന്ധിയന്‍ പാര്‍ട്ടിയുടെ സ്ഥാനാര്‍ത്ഥിയായി എത്തുന്നത് ആഷിനാണ്.
സംരംഭകത്വത്തിലൂടെ ഇന്ത്യയെ വികസിത രാജ്യങ്ങളുടെ പട്ടികയില്‍ ഒന്നാമതെത്തുകയാണ് ഇന്ത്യന്‍ ഗാന്ധിയന്‍ പാര്‍ട്ടിയുടെ ലക്ഷ്യം. ഇത്തവണ 543 ലോക്‌സഭാ മണ്ഡലങ്ങളിലും പാര്‍ട്ടി മത്സരിക്കുന്നുണ്ട്. ഫ്‌ളക്‌സോ പോസ്റ്ററോ മറ്റ് പ്രചാരണ പരിപാടികളോ ഇല്ലയെന്നതും പാര്‍ട്ടിയുടെ പ്രത്യേകതയാണ്.പൂര്‍ണ്ണമായും ഡിജിറ്റലൈസ്ഡ് പ്രചാരണമാണ് സംഘടിപ്പിച്ചിരിക്കുന്നത്.
ഗാന്ധിയന്‍ ആദര്‍ശങ്ങളോട് ആഭിമുഖ്യം പുലര്‍ത്തിയാണ് ഈ പാര്‍ട്ടിയുടെ പ്രവര്‍ത്തനങ്ങള്‍. ഫേസ്ബുക്ക് ക്യാംപെയിന്‍ വഴിയാണ് തെരഞ്ഞെടുപ്പ് പ്രചാരണ പ്രവര്‍ത്തനങ്ങള്‍ സംഘടിപ്പിച്ചിരിക്കുന്നത്. അധികാരത്തിലെത്തിയാല്‍ പതിനെട്ട് വയസ്സിന് ശേഷമുള്ളവര്‍ക്ക് തൊഴിലധിഷ്ഠിത വിദ്യാഭ്യാസവും അതുപോലെ ബിസിനസ് തുടങ്ങാനുള്ള സഹായവും നല്‍കും. ഇന്ത്യയിലെ 130 കോടി ആളുകള്‍ക്ക് 130 കോടി കഴിവുകളും ചിന്തകളുമാണെണെന്നും ഇവരെ ഏകോപിപ്പിക്കാന്‍ സാധിച്ചാല്‍ ഇന്ത്യ വികസനത്തിലെത്തുമെന്നും ആഷിന്‍ പറയുന്നു.
അതിനായി മികച്ച സംരംഭ സംവിധാനം ഒരുക്കിക്കൊടുക്കുക എന്നതാണ് പാര്‍ട്ടിയുടെ ലക്ഷ്യം. മൂന്നു മാസം മുമ്പു തന്നെ ലോക്‌സഭാ തെരഞ്ഞെടുപ്പില്‍ മത്സരിക്കാന്‍ തീരുമാനിച്ചിരുന്നതായി ആഷിന്‍ പറയുന്നു. സോഷ്യല്‍ മീഡിയ ക്യാംപെയിന്‍ വഴി അയ്യായിരത്തോളം അപേക്ഷകള്‍ ലഭിച്ചിട്ടുണ്ടെന്ന് ആഷിന്‍ പറയുന്നു. മാര്‍ച്ച് 23ന് സ്ഥാനാര്‍ത്ഥിപട്ടിക പൂര്‍ണ്ണമായി പുറത്തുവിടും. ഗാന്ധിയന്‍ ആശയങ്ങള്‍ സമൂഹത്തില്‍ നിന്ന് അകന്നു പോകുന്ന ഈ കാലയളവില്‍ ആഷിന്റെയും ഗാന്ധിയന്‍ പാര്‍ട്ടിയുടെയും പ്രസക്തിയേറുകയാണ്.
